Поэзийланак шочын, очыни

Сунгурова Раисия Борисовна 1987 ий 20 ноябрыште Параньга районысо Олор ялеш шочын кушкын, туштак кыдалаш школым тунем лектын. Ешыштыже кокымшо йоча, икымшыже кок ийлан кугурак – Алеша изаже, Аграрный колледжым пытарен, заочно юристлан тунемеш. Ачаже, Сунгуров Борис Константинович, колхозышто шофер, пеш весела, кутырызо, мыскарам йӧратыше. Мӱкшым онча. Пайремым гармонь дене вашлиеш. Аваже – Римма Пайгелдовна, кызыт образований пӧлкаште бухалтер. Ондак колхозын конторыштыжо, вара сельсоветыште ыштен. Шыма, тыматле ӱдырамаш. Пеледышым йӧрата, поснак розам шаркала. Нигӧн денат ок вурседал, осал шомакым ок пале. Коваже, Ольга Игнатьевна, унам да уныкажым эре шокшо кочкыш, тамле марий чес дене вашлиеш.

Поэзийлан Рая кумшо классыштак шӱмаҥын. Тидлан кугу тау мутым ава-ачалан гына огыл, Очеева Татьяна Ивановналан каласыман. Тудо школышто «Нӧргӧ лышташ» лӱман юнкор кружокым чумырен. Тыге икымше почеламут кумшо классыштак шочын, «Олор ялем» маналтеш, «Марий Эл» газетеш лектын. Тылеч вара поэзий чотак шупшылеш. Изирак годым йомакым, ойлымашым, мыскарам ятыр возгала, «Ямде лий», «Кугарня» газетлаш печатлалтыт. Эн кугу пашаже 10-шо классыште шочын – «Суксо» поэме, йолташыжлан пӧлекла.

Школым пытарымек, МарГУ-шко, ИФФ-шке, журналистлан тунемаш пура. Тыштат тудын пиалеш Татьяна Соловьеван (кызыт Светлакова) тыршымыж почеш «Поэзий шепкаште» сылнымут клуб вияҥеш, уло кумылын ушна. Тыгак кокымшо курсышто Александр Петровын самырык-влаклан чумырымо «Тулото» кружокышкыжат кошташ тореш ыш лий.

«Почеламут-влакем «Марий Эл» газетыштат печатлалтыч. Сылнымут пашаште Зоя Дудина, Альберт Васильев полшен шогеныт. Книгам чумыраш кум ий шонен коштынам. «Сылнымут шыже – 2007» эртымек, ача-авам ден мутланен, тарванаш лийна» – ойла ура чонан ӱдыр.

Икмыняр саскаже тыгай тӱшка книгалаш пурен: «Йӧратымаш нерген вел огыл…», «Поэзий шепкаште», «Вдохновение», «Нӧргӧ лышташ», «Тулото», «Кунам чонем кӱза каваш».

«Сылнымут шыже» эртымек, ойырен налме почеламутшым «Ончыко» журналеш савыктеныт, тыгак «Эрвий» альманахышкат пуртымо.

Кызыт нылымше курсыш вончен.

Шӱдыр, тылзе, кава да Юмо, чон яндарлык, Келшымаш, Йӧратымаш да Арулык ден каласен мошташат лийдыме гай, чылалан огыл пӱралтше Чоншижмашым йӧршын шке семынже тарватылме дене поэтесса йолташыж-влак деч чот-чот ойыртемалтеш. Тудым кугу сеҥымаш вуча!

Юрий Галютин-Ялзак.